“Торлаҡ һәм ҡала мөхите” милли проекты сиктәрендә “Таҙа һыу” төбәк проектын ғәмәлгә ашырыу

Рәсәй Федерацияһы Президентының 2018 йылдың 7 майындағы 204-се һанлы «2024 йылға тиклемге осорға Рәсәй Федерацияһын үҫтереүҙең милли маҡсаттары һәм стратегик бурыстары тураһында»ғы Указына, “Таҙа һыу” федераль проекты, республиканың “Экология” милли проектына ярашлы Башҡортостан Республикаһы Хөкүмәтенең 2018 йылдың 12 декабрендәге 1278-р һанлы ҡарары менән “Таҙа һыу” төбәк проектының паспорты ғәмәлгә индерелде.

Төбәк проектының маҡсаты – таҙа эсәр һыу менән күберәк кешене тәьмин итеү. Әле үҙәкләштерелгән һыу менән тәьмин итеү системаһынан таҙа һыуҙы 86,6% халыҡ эсә. 2024 йылда был күрһәткес 92,5%-ҡа етергә тейеш. Маҡсатҡа өлгәшеү өсөн республиканың 29 муниципалитет биләмәләрендә һыу менән тәьмин итеү объекттарын төҙөү һәм булғандарын реконструкциялау, төҙөкләндереү талап ителә. Улар араһында Әлшәй, Баймаҡ, Бишбүләк, Бөрө, Благовар, Благовещен, Дәүләкән, Иглин, Ҡалтасы, Ҡыйғы, Кушнаренко, Мәсетле, Стәрлетамаҡ, Өфө, Федоровка, Хәйбулла, Саҡмағош, Шишмә муниципаль райондары һәм Стәрлетамаҡ ҡалаһы ҡала округы бар. Бында үҙәкләштерелгән һыу менән тәьмин итеү системаларынан бирелгән һыуҙың сифаты норма талаптарына яуап бирмәй.

2019–2024 йылдарҙа был маҡсатта Башҡортостан Республикаһына 4 254,15 млн һум аҡса йүнәлтеү ҡаралған. Уларҙың 4 169,067 млн һумы – федераль, 85,08 млн һумы республика бюджетынан бүленәсәк (финанслауҙа төбәк бюджетынан ҡатнашлыҡ кимәле 2% тәшкил итә).